Denak grebara eta manifestazioetara 12etan

Bilbo: Arriaga

Donosti: Boulevard

Gasteiz: Andramari zuriaren plaza / Virgen Blanca

Iruñea: Udaletxe plaza / Plaza del Ayuntamiento

Artículo en castellano

Deskargatu kartela eta eskuorria

Ikasle Sindikatuatik irailaren 27ko ikasle greba orokorrerako deia egiten diegu Euskal Herriko ikasleei, Estatu mailako eta Europako ikasleekin batera. Greba hori gure planetak sufritzen duen klima aldaketaren eta ingurugiroaren hondamendiaren arduradunen aurkakoa da, hau da, multinazionalen, enpresa handien eta beren zerbitzura dauden gobernuen aurkakoa. Martxoaren 15ean gelak hustu eta kaleak bete genituenean argi esan genuen, eta orain ere mahai gainean jarri nahi dugu gure ekosistemaren eta gizateriaren biziraupenaren alde borroka egiteko prest gaudela gazteak.

M15eko indar erakustaldiaren ondoren, sistemaren defendatzaile diren mundu osoko politikariak gure mugimenduaren jabe egiten saiatu dira, aurpegia garbitzeko: modu oportunista batean mugimendura batu nahi izan dira, baina beste helburu batekin; mugimendua ahuldu nahi dute eta eduki antikapitalista kendu nahi diote. A zer hipokresia! Publikoki ingurugiroaz kezkatzen direla esan eta mugimenduarekin elkartasuna erakutsi ondoren, beste aldera begiratzen jarraitzen dute gure planeta suntsitzen ari diren multinazional eta botere ekonomikoen aurrean.

Kapitalismo berdearen gezur handia

NBEak ingurugiroaz egin zuen azken txostenean esaten zen 12 urte ditugula ingurugiroaren hondamendia saihesteko, baina beste ikerketa berriagoek erakutsi dute klimaren arazoa abiadura ikaragarrian ari dela okertzen. Txosten berri baten arabera, ingurugiroa zaintzeko neurri gehiago berehala hartzen ez badira, milioika heriotza izango dira Asian, Ekialde Hurbilean eta Afrikan. Tenperaturak inoizko altuenak izan dira hiri handietan (munduko biztanleen erdia bizi den lekuetan); desertizazioak, lehorteak eta hondamendi naturalak ugaritzen eta poloak urtzen ari dira modu dramatikoan: NASAk jakinarazi duenez, urtzeak Groenlandiako azaleraren %40ari eragin dio eta hilabete bat baino gutxiagoan urtu da %97a.

Egoera tamalgarri honek arrazoi zehatz bat du: klase agintariaren irabaziak mantentzeko edozer egiten duen sistema kapitalistaren ekoizteko modua. Mundu osoko CO2aren isurkinen %71 100 enpresek bakarrik eragiten dute, eta munduko pertsona aberatsenen %10a isurkinen %49aren arduradun da.

Multinazional horiek, Coca Colak eta Repsolek adibidez, milioika euro gastatzen dituzte beren buruak enpresa berde gisa aurkezteko eta produktu ekologikoak sortzeko, baina ez dituzte ingurugiroari loturiko akordio eta protokoloak betetzen eta, gainera, gobernu kapitalisten oniritzia dute. Adibide bat: munduko energia merkatua kontrolatzen duten petrolio enpresek 2018an berrehun milioi dolar inguru bideratu zituzten klima aldaketari aurre egiteko diseinaturiko edozein ekimen atzeratu eta oztopatzeko eta erregai fosilak ustiatzen jarraitzeko.

Horregatik, oso lotsagarria da arduradun horiek borroka honetan aliatutzat aurkeztea beren buruak. Ikasle Sindikatuak gogor salatzen dugu hipokresia hori eta egoera honen erruduntzat hartzen ditugu.

Enpresa handiak eta beren zerbitzura dauden gobernuak dira errudun!

Nazioarteko burgesiak kanpaina mediatiko bat abiatu du sistema kapitalistaren irudia garbitzeko. Baina argi esan behar dugu beren maniobrek, klimari buruzko goi-bilerek eta onartzen dituzten protokoloek ez dutela ezertarako balio eta ez gaituztela engainatzen  krisi klimatikoagatik “kezkatuta” daudela dioten agintariek. “Alderdi Berdeak” ere ez dira alternatiba, gobernuetan karguak izan dituzten herrialdeetan, Suedian, Irlandan eta Alemanian, ikusi da ez dutela hobekuntzarik lortu; areago, Troikaren herstura planak aplikatzea onartu dute.

Euskal Herrian, EAJ bere burua zuritu nahian dabil gazteriaren mobilizazioaren aurrean, irudi ekologista hartu nahian. Baina praktikan beti defendatu izan dituzte enpresarien irabaziak Euskal Herriko ingurumena suntsitzearen kontura. AHTaren obrak, Zubietako erraustegia, frackinga… Ez da kasualitatea Estatu espainiar guztiko kutsaduraren arduradun handiena Josu Jon Imaz izatea, EAJko Euskadi Buru Batzarreko lehendakari ohia eta egun Repsoleko kontseilukide delegatua.

Estatu espainiarrean ere sistemaren defendatzaileek planeta suntsitzen ari diren enpresak zuritzen ari dira. Erretorikaz haratago, PSOEren gobernuak ez du klima aldaketa konpontzeko neurririk hartu. Pedro Sanchezek dio beren lehentasunetako bat dela agenda ekologikoa osatzea, baina praktikan Mozal Legea atzera botatzeko promesarekin gertatu dena edo historiako gobernu feministena dela esan zuenean gertatu zena gertatu da: gezur hutsa!

Horregatik, greba hau ez da gobernuaren “gestio ekologiko onari” gorazarre egiteko, ez Urkullu edo Pedro Sanchezi txalo egiteko. Estatu espainiarrean ondorio nabarmenak dituen egoera klimatiko beldurgarri hau errotik aldatzeko asmoa balu Sanchezek, lehengo eta behin argindar enpresak nazionalizatu beharko lituzke eta langileen eskuetan jarri, ingurugiroaren suntsiketa geldiarazteko, publiko eta doakoak izateko eta energia pobreziarekin bukatzeko. Kalitatezko eta doako garraio publikoak bermatu beharko luke kutsaduraren aurka egiteko. Enpresa kutsakorrenen desjabetze bati ekin beharko lioke jasangarri egiteko eta ingurugiroa zaintzeko. Horrek guztiak, ordea, argindar enpresetako nagusien eta botere ekonomiko handien aurka jartzea esan nahi du, eta hori ez dago exekutiboaren agendan.

Irailak 27: Europa mailako ikasle greba

Jakin badakigu zerbait lortuko badugu, kaleko mobilizazioaren bidez izango dela eta horregatik datorren irailaren 27an gelak hustutzeko eta estatu osoan goizean izango diren manifestazioetan kaleak betetzeko deia egiten dugu. Klima aldaketaren aurkako ekintza batzordeak sortzeko deia egiten dugu institutu eta unibertsitateetan, greba eguna eta mobilizazioak antolatzeko.

Hala ere, borroka hau ez da gazteena bakarrik, langile guztiona baizik. Hori dela eta, langile sindikatu guztiei protestara batzeko deia egin eta 24 orduko greba orokorra konbokatzeko proposamena egiten diegu, ikasleak eta langileak elkartzeko, ez lelo abstraktuen azpian, baizik eta programa borrokalari eta iraultzaile batekin, basakeria ekologiko honen arduradunak kinka larrian jartzeko. Horren esku dago gure planeta: planeta suntsitzen ari dira, greba orokorra!

Hauxe eskatzen dugu:

• Zubietako erraustegia gelditu! Birziklatze enpresa publikoak, langileen kontrol demokratikopean. Negoziorik ez ekologismoarekin!

• Energia eta erregaiak sortzen dituzten multinazional guztiak nazionalizatzea eta inbertsio plan publiko bat egitea energia industria erabat ekologikoa eta jasangarria izan dadin. Energia pobreziari ez!

• AHTrik ez! Kalitatezko eta doako garraio publiko eta ekologikoaren alde. Inbertsio masiboa hiriak %100 jasangarriak izan daitezen.

• Automobil, aeronautika eta ontzigintza industriaren nazionalizazioa eta horien eraldaketa ekoizpena bideragarria eta ez-kutsagarria izan dadin.

• Lurraren, abeltzaintzaren eta elikagai prozesamenduen industriaren nazionalizazioa. Ozeanoen ustiatze kapitalistari ez! Elikadura jasangarri, ekologiko eta osasuntsuaren alde, gizarte osoarentzat!

• Langileen eta gazteen osotasunaren kontrol demokratikopean planifikaturiko ekoizpen jasangarria! Munduaren eraldaketa sozialista eta ekologikoaren alde!

Irailaren 27an guztiok grebara eta manifestazioetara.

Emakume Aske eta Borrokalariak

Eraiki gurekin feminismo antikapitalista eta iraultzailea

Catalá y Castellano

Jarrai gaitzazu